అమెరికాలో తిరిగి వస్తున్న 'ప్రెసిడెన్షియల్ ఫిట్‌నెస్ టెస్ట్'

అమెరికా అధ్యక్షుడు డొనాల్డ్ ట్రంప్ కీలక నిర్ణయం తీసుకున్నారు. బరాక్ ఒబామా హయాంలో నిలిపివేసిన 'ప్రెసిడెన్షియల్ ఫిట్‌నెస్ టెస్ట్' కార్యక్రమాన్ని పునరుద్ధరిస్తున్నట్లు ప్రకటించారు. దేశంలోని యువతలో శారీరక దారుఢ్యాన్ని, క్రీడా స్ఫూర్తిని పెంపొందించే లక్ష్యంతో ఈ కార్యక్రమాన్ని తిరిగి ప్రారంభిస్తున్నట్లు తెలిపారు. వైట్‌హౌస్‌లో క్రీడాకారులు, చిన్నారులు, కేబినెట్ అధికారులతో జరిగిన కార్యక్రమంలో ట్రంప్ ఈ ప్రకటన చేశారు.

ఈ సందర్భంగా ట్రంప్ మాట్లాడుతూ.. "ఈ రోజు నేను యూత్ స్పోర్ట్స్, ఫిట్‌నెస్‌ను గుర్తించే చారిత్రక ప్రకటనపై సంతకం చేశాను. పునరుద్ధరించిన ప్రెసిడెన్షియల్ ఫిట్‌నెస్ టెస్ట్ అవార్డు మొదటి కాపీని కూడా ఆవిష్కరించాను" అని తెలిపారు. 1950ల నుంచి 2013 వరకు ఈ ఫిట్‌నెస్ టెస్ట్ కొనసాగిందని, కానీ ఒబామా ప్రభుత్వం ఈ గొప్ప సంప్రదాయాన్ని పక్కన పెట్టిందని ట్రంప్ వ్యాఖ్యానించారు. పోటీతత్వం అమెరికాకు చాలా కీలకమని, అందుకే మహిళల క్రీడల్లో పురుషులు పాల్గొనడాన్ని నిషేధించామని గుర్తుచేశారు.

ఈ కార్యక్రమంలో పాల్గొన్న అమెరికా ఆరోగ్యశాఖ మంత్రి  రాబర్ట్ ఎఫ్.కెన్నడీ జూనియర్ మాట్లాడుతూ.. అమెరికా తీవ్ర ప్రజారోగ్య సంక్షోభంలో ఉందని ఆందోళన వ్యక్తం చేశారు. "ప్రపంచంలోనే మనం అత్యంత అనారోగ్యకరమైన దేశంగా మారాం. 77 శాతం యువత సైనిక సేవకు అర్హత సాధించలేకపోతున్నారు" అని తెలిపారు. ఈ ఫిట్‌నెస్ టెస్ట్‌ను తన మేనమామ, మాజీ అధ్యక్షుడు జాన్ ఎఫ్.కెన్నడీ ప్రారంభించారని ఆయన గుర్తు చేసుకున్నారు.

రక్షణ కార్యదర్శి పీట్ హెగ్సెత్ మాట్లాడుతూ శారీరక ప్రమాణాలు సైనిక సంసిద్ధతకు ముడిపడి ఉన్నాయని అన్నారు. గోల్ఫర్ బ్రైసన్ డిచాంబ్యూ మాట్లాడుతూ ఈ కార్యక్రమాన్ని తొలుత 160 సైనిక పాఠశాలల్లో ప్రారంభించి, ఆ తర్వాత దేశవ్యాప్తంగా విస్తరిస్తామని తెలిపారు. ప్రచ్ఛన్న యుద్ధ కాలంలో యువత శారీరక సామర్థ్యంపై ఆందోళనలతో ఈ పరీక్షను తొలిసారిగా ప్రవేశపెట్టారు. ఇందులో పుల్-అప్స్, సిట్-అప్స్, షటిల్ రన్ వంటి వ్యాయామాలు ఉంటాయి.